ਸਿਓਲ-ਉੱਤਰੀ ਕੋਰੀਆ ਨੇ ਆਪਣੇ ਸੰਵਿਧਾਨ ‘ਚ ਸੋਧ ਕਰ ਕੇ ਦੱਖਣੀ ਕੋਰੀਆ ਨੂੰ ਪਹਿਲੀ ਵਾਰ ‘ਦੁਸ਼ਮਣ ਰਾਸ਼ਟਰ’ ਐਲਾਨ ਦਿੱਤਾ ਹੈ। ਉੱਤਰੀ ਕੋਰੀਆ ਦੀ ਸੰਸਦ ਨੇ ਸੰਵਿਧਾਨ ਨੂੰ ਬਦਲਣ ਲਈ ਪਿਛਲੇ ਹਫ਼ਤੇ ਦੋ ਦਿਨ ਬੈਠਕ ਕੀਤੀ। ਉੱਤਰੀ ਕੋਰੀਆ ਦੇ ਨੇਤਾ ਕਿਮ ਜੋਂਗ ਉਨ ਨੇ ਜਨਵਰੀ ਵਿਚ ਦੱਖਣੀ ਕੋਰੀਆ ਨੂੰ ਦੇਸ਼ ਦਾ ਮੁੱਖ ਦੁਸ਼ਮਣ ਘੋਸ਼ਿਤ ਕਰਨ ਦੀ ਮੰਗ ਕੀਤੀ ਸੀ।
ਨਿਊਜ਼ ਏਜੰਸੀ ਰਾਇਟਰਜ਼ ਦੇ ਅਨੁਸਾਰ, ਉੱਤਰੀ ਕੋਰੀਆ ਨੇ ਉਨ੍ਹਾਂ ਸੜਕਾਂ ਅਤੇ ਰੇਲ ਲਿੰਕਾਂ ਨੂੰ ਤਬਾਹ ਕਰ ਦਿੱਤਾ ਜੋ ਹੁਣ ਵਰਤੋਂ ਵਿੱਚ ਨਹੀਂ ਹਨ ਅਤੇ ਜੋ ਕਦੇ ਉੱਤਰੀ ਕੋਰੀਆ ਨੂੰ ਦੱਖਣੀ ਕੋਰੀਆ ਨਾਲ ਜੋੜਦੇ ਸਨ। ਕੋਰੀਅਨ ਸੈਂਟਰਲ ਨਿਊਜ਼ ਏਜੰਸੀ (ਕੇਸੀਐਨਏ) ਨੇ ਕਿਹਾ ਕਿ ਦੋਵਾਂ ਦੇਸ਼ਾਂ ਨੂੰ ਜੋੜਨ ਵਾਲੇ ਸੜਕ ਮਾਰਗ ਨੂੰ ਕੱਟਣਾ ਸਪੱਸ਼ਟ ਤੌਰ ‘ਤੇ ਦੱਖਣੀ ਕੋਰੀਆ ਨੂੰ ਦੁਸ਼ਮਣ ਦੇਸ਼ ਵਜੋਂ ਪਰਿਭਾਸ਼ਿਤ ਕਰਦਾ ਹੈ।
ਦੱਖਣੀ ਕੋਰੀਆ ਦੀ ਫ਼ੌਜ ਨੇ ਮੰਗਲਵਾਰ ਨੂੰ ਉੱਤਰੀ ਕੋਰੀਆ ਦੇ ਸੈਨਿਕਾਂ ਨੂੰ ਦੋਵਾਂ ਦੇਸ਼ਾਂ ਨੂੰ ਜੋੜਨ ਵਾਲੀਆਂ ਸੜਕਾਂ ਅਤੇ ਰੇਲ ਲਾਈਨਾਂ ‘ਤੇ ਵਿਸਫੋਟਕਾਂ ਨਾਲ ਵਿਸਫੋਟ ਕਰਨ ਦੀ ਵੀਡੀਓ ਫੁਟੇਜ ਜਾਰੀ ਕੀਤੀ।
ਜ਼ਿਕਰਯੋਗ ਹੈ ਕਿ ਇਸ ਸਾਲ ਜਨਵਰੀ ਵਿੱਚ ਕਿਮ ਜੋਂਗ ਉਨ ਨੇ ਦਿੱਤੇ ਭਾਸ਼ਣ ਵਿੱਚ ਸੰਵਿਧਾਨਕ ਬਦਲਾਅ ਦੀ ਮੰਗ ਕੀਤੀ ਸੀ। ਕਿਮ ਜੋਂਗ ਉਨ ਨੇ ਕਿਹਾ ਸੀ ਕਿ ਜੇ ਦੱਖਣੀ ਕੋਰੀਆ ਸਾਡੀ ਜ਼ਮੀਨ, ਹਵਾ ਅਤੇ ਜਲ ਖੇਤਰ ਦੇ 0.001 ਮਿਲੀਮੀਟਰ ਤੱਕ ਵੀ ਘੇਰਾਬੰਦੀ ਕਰਦਾ ਹੈ ਤਾਂ ਯੁੱਧ ਹੋ ਜਾਵੇਗਾ।
