ਚੰਡੀਗੜ੍ਹ
ਯੂਪੀ ਵਿੱਚ ਵਿਧਾਨ ਸਭਾ ਚੋਣਾਂ ਲਈ ਮੈਦਾਨ ਭਖ਼ ਗਿਆ ਹੈ। ਨੇਤਾਵਾਂ ਦਰਮਿਆਨ ਸ਼ਬਦਾਂ ਜੰਗ ਤੇਜ਼ ਹੋ ਗਈ ਹੈ। ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਦੇ ਅੱਬਾਜਾਨ ਦੇ ਜੁਮਲੇ ਤੋਂ ਬਾਅਦ ਹੁਣ ਭਾਰਤੀ ਕਿਸਾਨ ਯੂਨੀਅਨ ਦੇ ਨੇਤਾ ਰਾਕੇਸ਼ ਟਿਕੈਤ ਵੱਲੋਂ ਏਆਈਐੱਮਆਈਐੱਮ ਤੇ ਮੁਖੀ ਅਸਦੁਦੀਨ ਓਵੈਸੀ ਨੂੰ ਭਾਜਪਾ ਦਾ ਚਚਾਜਾਨ ਆਖ ਦਿੱਤਾ ਹੈ। ਟਿਕੈਤ ਬਾਗਪਤ ਵਿੱਚ ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਭਾਜਪਾ ਦੇ ਚਾਚਜਾਨ ਅਸਦੁਦੀਨ ਓਵੈਸੀ ਯੂਪੀ ਆਏ ਹਨ। ਜੇ ਓਵੈਸੀ ਭਾਜਪਾ ਨੂੰ ਗਾਲਾਂ ਵੀ ਕੱਢ ਦੇਣ ਤਦ ਵੀ ਉਨ੍ਹਾਂ ਖ਼ਿਲਾਫ਼ ਕੋਈ ਕੇਸ ਦਰਜ ਨਹੀਂ ਕੀਤਾ ਜਾਵੇਗਾ, ਕਿਉਂਕਿ ਓਵੈਸੀ ਭਾਜਪਾ ਦੀ ਹੀ ਇਕ ਟੀਮ ਹੈ। ਇਸ ਮਾਮਲੇ ਵਿੱਚ ਕਾਂਗਰਸ ਵੀ ਪਿੱਛੇ ਨਹੀਂ ਹੈ। ਉਸ ਦੇ ਬੁਲਾਰੇ ਸੁਰਿੰਦਰ ਰਾਜਪੂਤ ਨੇ ਵੀ ਇਸ ਵਿਵਾਦ ‘ਤੇ ਪ੍ਰਤੀਕਿਰਿਆ ਦਿੱਤੀ ਹੈ। ਕਾਂਗਰਸੀ ਆਗੂ ਨੇ ਕਿਹਾ ਕਿ ਜਿੱਥੇ ਵੀ ਭਾਰਤੀ ਜਨਤਾ ਪਾਰਟੀ ਮੁਸੀਬਤ ਵਿੱਚ ਨਜ਼ਰ ਆਈ ਉਥੇ ਓਵੈਸੀ ਉਸ ਦੀ ਮਦਦ ਲਈ ਆ ਜਾਂਦਾ ਹੈ। ਇਸ ਲਈ ਉਹ ਭਾਜਪਾ ਦੇ ਚਚਾਜਾਨ ਹੋਏ ਤੇ ਹੁਣ ਭਾਜਪਾ ਦੱਸੇ ਕਿ ਉਹ ਆਪਣੇ ਚਚਾਜਾਨ ਤੋਂ ਕੀ ਮਦਦ ਲੈਂਦੀ ਹੈ। ਉਨ੍ਹਾਂ ਮੁੱਖ ਮੰਤਰੀ ਯੋਗੀ ਨੂੰ ਕਿਹਾ ਕਿ ਹੁਣ ਚੋਣਾਂ ਅੱਬਾਜਾਨ, ਚਚਾਜਾਨ ਜਾਂ ਅੰਮੀਜਾਨ ਵਰਗੇ ਮਸਲਿਆਂ ’ਤੇ ਨਹੀਂ, ਸਗੋਂ ਭ੍ਰਿਸ਼ਟਾਚਾਰ, ਬੇਰੁਜ਼ਗਾਰੀ ਤੇ ਮਹਿੰਗਾਈ ’ਤੇ ਲੜੀਆਂ ਜਾਣਗੀਆਂ। ਇਸ ਦੌਰਾਨ ਏਆਈਐੱਮਆਈਐੱਮ ਦੇ ਤਰਜਮਾਨ ਅਮੀਰ ਵਕਾਰ ਨੇ ਕਿਹਾ ਕਿ ਟਿਕੈਤ ਕਿੰਨੇ ਧਰਮਨਿਰਪੱਖ ਹਨ ਇਹ ਸਾਰੇ ਜਾਣਦੇ ਹਨ। 2017 ਤੇ 2019 ਦੀਆਂ ਚੋਣਾਂ ਵਿੱਚ ਉਹ ਭਾਜਪਾ ਨਾਲ ਸਨ ਤੇ ਅੱਜ ਉਹ ਮੰਚ ਤੋਂ ਉਸ ਖ਼ਿਲਾਫ਼ ਨਾਅਰੇ ਲਗਾ ਰਹੇ ਹਨ ਪਰ ਜਦੋਂ ਮੁਜ਼ੱਫ਼ਰਨਗਰ ਦੇ ਦੰਗੇ ਹੋਏ ਉਹ ਉਦੋਂ ਕਿਥੇ ਸੀ। 2022 ਦੀਆਂ ਚੋਣਾਂ ਵਿੱਚ ਤੈਅ ਹੋ ਜਾਵੇਗਾ ਕਿ ਟਿਕੈਤ ਭਾਜਪਾ ਦੀ ਪਿੱਚ ਤੇ ਭਾਜਪਾ ਦੇ ਬੱਲੇ ਤੇ ਗੇਂਦ ਨਾਲ ਖੇਡ ਸਕਦੇ ਹਨ। ਉਹ ਆਪਣੇ ਉਮੀਦਵਾਰ ਉਤਾਰ ਕੇ ਕਹਿਣਗੇ ਕਿ ਭਾਜਪਾ ਦਾ ਮੁਕਾਬਲਾ ਕੀਤਾ ਜਾ ਰਿਹਾ ਹੈ ਪਰ ਅਸਲ ਵਿੱਚ ਉਹ ਭਾਜਪਾ ਵਿਰੋਧੀ ਵੋਟਾਂ ਨੂੰ ਲੈ ਕੇ ਯੋਗੀ ਦਾ ਰਾਹ ਪੱਧਰਾ ਕਰਨਗੇ।
