ਮੁੰਬਈ:ਅਦਾਕਾਰਾ ਰਿਚਾ ਚੱਢਾ ਨੂੰ ਪਹਾੜਾਂ ਵਿੱਚ ਸੀਰੀਜ਼ ‘ਕੈਂਡੀ’ ਦੀ ਸ਼ੂਟਿੰਗ ਕਰਨੀ ਇੰਨੀ ਪਸੰਦ ਆਈ ਕਿ ਉਹ ਨਿਰਮਾਤਾ ਵਜੋਂ ਆਪਣਾ ਪਹਿਲੇ ਪ੍ਰਾਜੈਕਟ ‘ਗਰਲਜ਼ ਵਿਲ ਬੀ ਗਰਲਜ਼’ ਦੀ ਸ਼ੂਟਿੰਗ ਉਤਰਾਖੰਡ ਵਿੱਚ ਕਰਨ ਜਾ ਰਹੀ ਹੈ। ਸ਼ੁਚੀ ਤਲਾਤੀ ਦੇ ਨਿਰਦੇਸ਼ਨ ਹੇਠ ਬਣਨ ਜਾ ਰਹੀ ਇਹ ਫਿਲਮ ਦੀ ਕਹਾਣੀ ਉੱਤਰੀ ਭਾਰਤ ਵਿੱਚ ਇੱਕ ਹਿੱਲ ਸਟੇਸ਼ਨ ਦੇ ਹਿਮਾਲਿਅਨ ਬੋਰਡਿੰਗ ਸਕੂਲ ’ਤੇ ਆਧਾਰਿਤ ਹੈ। ਇਸ ਬਾਰੇ ਰਿਚਾ ਨੇ ਕਿਹਾ, ‘‘ਮੈਨੂੰ ‘ਕੈਂਡੀ’ ਦੀ ਸ਼ੂਟਿੰਗ ਦੌਰਾਨ ਬਹੁਤ ਆਨੰਦ ਆਇਆ। ਇਸ ਫਿਲਮ ਦੀ ਕਹਾਣੀ ਤਾਂ ਦਿਲ ਖਿੱਚਵੀਂ ਹੈ ਹੀ ਸੀ, ਨਾਲ ਹੀ ਜਿੱਥੇ ਅਸੀਂ ਇਸ ਦੀ ਸ਼ੂਟਿੰਗ ਕੀਤੀ ਉਹ ਸਥਾਨ ਵੀ ਬਹੁਤ ਸ਼ਾਨਦਾਰ ਸੀ। ਉਹ ਇਲਾਕਾ ਬਹੁਤ ਸ਼ਾਂਤੀਪੂਰਨ ਸੀ। ਸ਼ਹਿਰ ਦੇ ਮੁਕਾਬਲੇ ਮੈਨੂੰ ਉੱਥੇ ਧਿਆਨ ਕੇਂਦਰਿਤ ਕਰਨਾ ਸੌਖਾ ਲੱਗਿਆ।’’ ਉਸ ਨੇ ਕਿਹਾ, ‘‘ਫਿਲਮ ‘ਗਰਲਜ਼ ਵਿਲ ਬੀ ਗਰਲਜ਼’ ਇੱਕ ਹਿੱਲ ਸਟੇਸ਼ਨ ਦੇ ਬੋਰਡਿੰਗ ਸਕੂਲ ’ਤੇ ਆਧਾਰਿਤ ਹੈ, ਇਸ ਕਰਕੇ ਮੈਨੂੰ ਲੱਗਦਾ ਹੈ ਕਿ ਇਸ ਦੀ ਸ਼ੂਟਿੰਗ ਲਈ ਉਤਰਾਖੰਡ ਬਿਲਕੁਲ ਸਹੀ ਜਗ੍ਹਾ ਹੋਵੇਗੀ।’’