ਲੰਡਨ : ਬ੍ਰਿਟੇਨ ਦੇ ਮੈਡੀਸਨ ਰੈਗੂਲੇਟਰੀ ਨੇ ਵੀਰਵਾਰ ਨੂੰ ਕੋਵਿਡ-19 ਦੇ ਇਕ ਨਵੇਂ ਐਂਟੀਬਾਡੀ ਇਲਾਜ ਨੂੰ ਮਨਜ਼ੂਰੀ ਦੇ ਦਿੱਤੀ। ਉਸ ਦਾ ਮੰਨਣਾ ਹੈ ਕਿ ਇਹ ਇਲਾਜ ਕੋਵਿਡ ਦੇ ਓਮੀਕ੍ਰੋਨ ਜਿਹੇ ਨਵੇਂ ਵੇਰੀਐਂਟ ਖ਼ਿਲਾਫ਼ ਵੀ ਕਾਰਗਰ ਹੋਵੇਗਾ। ਦਵਾਈ ਤੇ ਸਿਹਤ ਦੇਖਭਾਲ ਉਤਪਾਦ ਰੈਗੂਲੇਟਰੀ ਏਜੰਸੀ (ਐੱਮਐੱਚਆਰਏ) ਨੇ ਕਿਹਾ ਕਿ ਸ਼ੇਵੁਡੀ ਜਾਂ ਸੋਟ੍ਰੋਵਿਮੈਬ, ਹਲਕੇ ਤੋਂ ਮੱਧਮ ਇਨਫੈਕਸ਼ਨ ਵਾਲੇ ਪੀੜਤਾਂ ਲਈ ਹੈ, ਜਿਨ੍ਹਾਂ ’ਚ ਗੰਭੀਰ ਰੋਗ ਵਿਕਸਤ ਹੋਣ ਦਾ ਖ਼ਤਰਾ ਜ਼ਿਆਦਾ ਹੈ। ਜੀਐੱਸਕੇ ਤੇ ਵੀਰ ਬਾਇਓਟੈਕਨਾਲੋਜੀ ਵੱਲੋਂ ਵਿਕਸਤ ਸੋਟ੍ਰੋਵਿਮੈਬ ਇਕ ਖ਼ੁਰਾਕ ਵਾਲੀ ਐਂਟੀਬਾਡੀ ਹੈ। ਇਹ ਕੋਰੋਨਾ ਵਾਇਰਸ ਦੇ ਬਾਹਰੀ ਸਤਹਿ ’ਤੇ ਸਪਾਈਕ ਪ੍ਰੋਟੀਨ ਨਾਲ ਜੁੜ ਕੇ ਕੰਮ ਕਰਦੀ ਹੈ ਤੇ ਵਾਇਰਸ ਨੂੰ ਮਨੁੱਖੀ ਕੋਸ਼ਿਕਾ ’ਚ ਪ੍ਰਵੇਸ਼ ਕਰਨ ਤੋਂ ਰੋਕ ਦਿੰਦੀ ਹੈ। ਇਸ ਨਾਲ ਵਾਇਰਸ ਦਾ ਪ੍ਰਸਾਰ ਨਹੀਂ ਹੋ ਪਾਉਂਦਾ।
ਐੱਮਐੱਚਆਰਏ ਦੀ ਮੁੱਖ ਕਾਰਜਕਾਰੀ ਅਧਿਕਾਰੀ ਡਾ. ਜੂਨ ਰੈਨ ਨੇ ਕਿਹਾ, ‘ਮੈਨੂੰ ਇਹ ਦੱਸਦੇ ਹੋਏ ਖ਼ੁਸ਼ੀ ਹੋ ਰਹੀ ਹੈ ਕਿ ਸਾਡੇ ਕੋਲ ਹੁਣ ਉਨ੍ਹਾਂ ਲੋਕਾਂ ਲਈ ਕੋਵਿਡ-19 ਦਾ ਇਕ ਸੁਰੱਖਿਅਤ ਤੇ ਕਾਰਗਰ ਇਲਾਜ ਸੋਟ੍ਰੋਵਿਮੈਬ ਹੈ, ਜਿਨ੍ਹਾਂ ’ਚ ਗੰਭੀਰ ਰੋਗ ਵਿਕਸਤ ਹੋਣ ਦਾ ਖ਼ਤਰਾ ਹੈ।’ ਉਨ੍ਹਾਂ ਕਿਹਾ, ‘ਇਸ ’ਚ ਗੁਣਵੱਤਾ, ਸੁਰੱਖਿਆ ਤੇ ਪ੍ਰਭਾਵ ਨੂੰ ਲੈ ਕੇ ਸਮਝੌਤਾ ਨਹੀਂ ਕੀਤਾ ਗਿਆ ਹੈ। ਇਸ ਨੂੰ ਧਿਆਨ ’ਚ ਰੱਖਦੇ ਹੋਏ ਲੋਕ ਇਹ ਯਕੀਨ ਕਰ ਸਕਦੇ ਹਨ ਕਿ ਐੱਮਐੱਚਆਰਏ ਨੇ ਸਾਰੇ ਉਪਲਬਧ ਅੰਕੜਿਆਂ ਦਾ ਗਹਿਰਾ ਵਿਸ਼ਲੇਸ਼ਣ ਕੀਤਾ ਹੈ।’ ਐੱਮਐੱਚਆਰਏ ਨੇ ਕਿਹਾ ਕਿ 12 ਸਾਲ ਤੇ ਉਸ ਤੋਂ ਵੱਧ ਉਮਰ ਦੇ 40 ਕਿੱਲੋ ਤੋਂ ਜ਼ਿਆਦਾ ਵਜ਼ਨ ਵਾਲੇ ਵਿਅਕਤੀਆਂ ਦੇ ਇਲਾਜ ’ਚ ਸੋਟ੍ਰੋਵਿਮੈਬ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ। ਇਸ ਨੂੰ ਨਰਸਾਂ ਰਾਹੀਂ 30 ਮਿੰਟ ’ਚ ਚੜ੍ਹਾਇਆ ਜਾਵੇਗਾ।
ਐੱਮਐੱਚਆਰਏ ਨੇ ਕਿਹਾ, ‘ਇਹ ਜਾਣਨਾ ਹਾਲੇ ਜਲਦਬਾਜ਼ੀ ਹੋਵੇਗੀ ਕਿ ਸੋਟ੍ਰੋਵਿਮੈਬ, ਓਮੀਕ੍ਰੋਨ ਵੇਰੀਐਂਟ ਖ਼ਿਲਾਫ਼ ਕਿੰਨੀ ਅਸਰਦਾਰ ਹੋਵੇਗੀ, ਪਰ ਇਸ ਬਾਰੇ ਜਾਣਕਾਰੀ ਇਕੱਠੀ ਕਰਨ ਲਈ ਮੈਨੂਫੈਕਚਰਰਾਂ ਨਾਲ ਕੰਮ ਕਰਾਂਗੇ।’ ਹਾਲਾਂਕਿ ਮੁੱਢਲੇ ਅਧਿਐਨ ਦੇ ਹਵਾਲੇ ਨਾਲ ਸ਼ੋਧਕਰਤਾਵਾਂ ਦਾ ਕਹਿਣਾ ਹੈ ਕਿ ਇਹ ਵਾਇਰਸ ਦੇ ਸਪਾਈਕ ਪ੍ਰੋਟੀਨ ਨੂੰ ਨਿਸ਼ਾਨਾ ਬਣਾਉਂਦੀ ਹੈ, ਜਿਸ ’ਚ ਹਾਲੇ ਤਕ ਕੋਈ ਵੱਡਾ ਬਦਲਾਅ ਨਹੀਂ ਆਇਆ ਹੈ। ਅਜਿਹੇ ’ਚ ਸੋਟ੍ਰੋਵਿਮੈਬ ਨੂੰ ਸਾਰੇ ਵੇਰੀਐਂਟ ਖ਼ਿਲਾਫ਼ ਕੰਮ ਕਰਨਾ ਚਾਹੀਦਾ ਹੈ।
